هل هذا مشروع مربح؟
إزاى تعمل دراسة جدوى لمشروع إى مشروع
----؛----
س: الكيلو هيتكلف ٧٠ جنيه وهاابيعه ب ١٠٠ جنيه..يعنى كده هاأكسب ٣٠ جنيه في كل كيلو..يعني ٣٠% من المبيعات، و٤٢.٨% من التكلفة..فهل كده مشروعي مربح وناجح؟
ج: متوقع تبيع كام كيلو؟
س: توقعاتي كبيرة .. لكن قولي من وجهة نظر حضرتك..ابني توقعاتي إزاي؟
ج: هتبنيها على طاقتك الانتاجية والتسويقية من ناحية، والسوق اللي هتقدر تأخده من ناحية تانية.
س: يعني أنا ممكن ابيع ١٠٠٠ كيلو في الشهر.. فهل كده المشروع مربح؟
ج: لو فعلا ومتأكد أنك هتقدر تبيع ١٠٠٠ كيلو شهريا وبسعر ١٠٠ جنيه للكيلو وبتكلفة ٧٠ جنيه للكيلو ..فانت كده هيكون عندك اجمالي ربح على المبيعات ٣٠٠٠٠ جنيه، لكن لسه مانعرفش المشروع مربح والا لأ..هنحتاج تعرف المصاريف الثابتة شهريا كام؟
س: يعني ايه المصاريف الثابتة؟
ج: يعني كل المصاريف الشهرية اللي مالهاش علاقة بعدد الوحدات المباعة .. بمعني أنها ثابتة سواء بعنا أم لا..يعني كل المصروفات الشهرية اللي مادخلتش في ال٧٠ جنيه تكلفة انتاج الكيلو.. زي الايجار والعمالة والطاقة والتسويق والاهلاك.
س: آه..الايجار ١٠٠٠٠ جنيه والعمالة ٥٠٠٠جنيه والكهرباء ٢٠٠٠ جنيه والتسويق ٢٠٠٠ جنيه ونقول اهلاك ١٠٠٠ جنيه.
ج:لو كده بس..يبقى يبقى صافي الربح قبل اعباء التمويل والضرائب هيكون ١٠٠٠٠ جنيه شهريا.
س: تمام جدا..يعني كده المشروع مربح وكويس؟
ج: ماينفعش نقرر على كده.. لازم ناخد الربح الشهري ونحوله لسنوي ونستبعد منه اعباء التمويل والضرائب وبعدين نقارنه بإجمالي الاستثمار في المشروع..والناتج هو نسبة العائد على الاستثمار.. أنت رأس مال مشروعك كام وهل كلهم فلوسك والا عليك قرض او واخد تمويل ولازم بعائد من الارباح وهيكون عليك اعباء تمويل والا لأ؟
س: رأس مالي ٢٠٠٠٠٠ جنيه، وماعنديش اي ديون.. معنى كده من غير الضرائب هيبقى نسبة ربحي كام؟
ج: نسبة ربحك (بالالف جنيه)
قيمة المبيعات السنوية ١٠٠× ١٢ شهر= ١٢٠٠
نطرح التكاليف المباشرة السنوية=
٧٠×١٢شهر =٨٤٠
--------------؛---------------
مجمل الربح السنوي = ٣٦٠
نطرح التكاليف الثابتة= ٢٠×١٢ شهر= ٢٤٠
---------------؛-------------
صافي الربح السنوي = ١٢٠
نسبة الربح على استثمارك=٢٠٠/١٢٠= ٦٠%
س: يعني على الارقام دي..
كده المشروع كويس؟
ج: على الارقام دي.. هيبقى كويس لو حققت الارقام دي.. يعني لو بعت الكمية دي بالسعر ده بالتكاليف دي باجمالي الاستثمار ده لو يناسبك.
س: إيه كل ال (لو) دي..هي مافيش حاجة أكيدة.
ج: طبعا لأ. انت اللي بتأكدها بنفسك.. سواء بدراستك الجيدة للمشروع قبل مايبدأ او بتشغيلك وادارتك للمشروع لما يشتغل.
س: طيب يعني ايه يناسبني؟
ج: يعني.. كعائد على الاستثمار فهو جيد جدا.. لكن لو يناسب مجهودك وفرصتك البديلة في أنك تشتغل في مجال تاني او وظيفة..فده يرجع ليك.
س: أنا ممكن الاقي وظيفة ب ١٢٠٠٠ جنيه شهري.. لكن انا عايز اعمل مشروعي الخاص.
ج: ده كده معقول جدا وبداية فوق الممتازة بالنسبة لرأس مالك وجيدة بالنسبة لفرصك الوظيفية.. بس أفكرك تاني.. المهم في الارقام انك تتأكد من تحققها بقدر الامكان وتدرس السوق كويس والمنافسة واسعار البيع والتكاليف المتغيرة والثابتة والعمالة والمواد الخام وتعمل خطة تسويقية وتنتبه وتقيم وتتابع وتدير.
منقول
